農曆新年有唔少習俗,譬如過咗正月十五,一般就當過咗新年,唔會再派利是,不過,立法會議員梁美芬尋日同傳媒茶敍時,仍拎住一大疊利是周圍派,仲派咗兩封畀金融服務界議員張華峰(肥老闆)添。

肥老闆(左)獲梁美芬派利是,好識做咁順手宣傳。

嘩!肥老闆點睇都唔係逗利是嘅人噃,點解梁美芬要送上利是呢?原來梁美芬興致勃勃同肥老闆介紹兩個唔同款式嘅利是封,其中一個係印有梁嘅漫畫公仔造型。肥老闆收利是後,即刻舉高照吓利是封入面裝咗幾多錢,唔通佢覺得梁美芬會封大利是畀佢?雖然唔知封咗幾多錢,但肥老闆睇完就將利是放入西裝褸左邊胸前口袋,仲凸出梁美芬個漫畫公仔幫手賣廣告添,都算唔話得喇!

第一手消息請下載on.cc東網iPhone/iPad/Android/Windows Phone Apps