政壇：籲扣長者身份證 網台亂噏恐犯法
明日就係立法會新界東補選投票日，由鄭經翰創辦嘅D100全球華人網絡電台，尋日下午喺社交網站上載圖片，指有網民呼籲喺投票日收起住老人院嘅長者身份證，喺選舉翌日先交還長者，以免老人院喺投票日帶長者出外投票，令長者投票意願受影響。執業大律師陸偉雄話，保管他人身份證屬犯法，而D100作出呼籲有可能煽動他人犯法。
D100在社交網站上載圖片，呼籲在投票日收起住老人院嘅長者身份證。（互聯網圖片）
陸偉雄指根據香港法例177章《人事登記條例》第7A條，任何人無合法權限或合理辯解，使用或保管或管有他人身份證或根據本條例發出而屬於他人的其他文件，即屬犯罪。D100回應話係有網民直接聯絡佢哋盼作有關呼籲。由於事件可能觸犯法例，D100隨即澄清同刪除有關呼籲，改為呼籲大家「做多少少」，喺投票日陪長者親人去投票，拒絕老人院帶長者親人去投票同參與茶敍。
