政壇：楊哲安送三千金放洋
香港向來係繁榮安定之都，但經歷初一暴亂，令城中好多人感傷心震驚，有啲仲提早為仔女鋪定路。教育局前政治助理楊哲安（Jeremy）就係最新一例，原來佢同太太、前藝人張新悅（Nicola）對育兒有共同理念，雖然三個囡囡仲好細個，但兩夫妻打算等佢哋初中就送去外國讀書，唔通管過香港教育嘅前問責官員，都覺得本地教育唔掂？
稱有助訓練獨立
Jeremy解釋，其實佢唔係對香港教育冇信心，而係一來怕咗本地嘅怪獸家長，二來同旺角暴亂有關，佢見到電視片段中暴徒同警方激烈鬥爭，好擔心囡囡將來參加埋一份。另一原因係，Jeremy同太太都冇幫囡囡安排好多興趣班或學前班，對比其他安排好多興趣班畀子女嘅家長，佢哋就成為異數，仲疑似被人杯葛添，因此怕咗班怪獸家長，成為打算安排囡囡去外國留學嘅理由。
此外，呢個決定或者都同呢對夫妻嘅成長經歷有關，Jeremy細個試過喺北京同英國讀中小學，之後仲要喺英國牛津大學同倫敦政治經濟學院分別完成學士同碩士。而Nicola就住過台灣同喺加拿大讀中學，兩夫婦都浸過鹹水，認為放洋可訓練囡囡獨立。
Jeremy又話，依家三個囡囡，除咗一歲孻女，七歲嘅Lucy同五歲嘅Lily都分別就讀聖士提反女子中學附屬幼稚園及小學，遲多幾年，踏入初中階段，就會畀佢哋嘗試獨自放洋求學嘅生活。問及佢哋會唔會追多個？Jeremy就話父親唔係傳統嘅人，加上又冇家族生意要承傳，所以冇壓力要追番個仔，但承認當年生孻女時都係冇諗過嘅。
