財政司司長曾俊華計錯數早就唔係新聞，估唔到依家居然玩埋數字遊戲，問你服未！

就講財政盈餘吖，根據預算案嘅講法，本年度帳面盈餘係三百零五億元，僅較去年估算嘅三百六十八億元少六十三億元，表面睇差距似乎唔大，其實鬍鬚曾只係玩財技咋，佢事先將四百四十五億元盈餘撥入房屋儲備基金，兩條數加埋，本年度嘅實際盈餘多達七百五十億元，比原先估計嘅足足相差一倍有多。

財政盈餘玩數字遊戲，派糖措施一樣玩掩眼法。預算案聲稱推出總值三百八十八億元嘅紓困措施，表面上較去年加碼四十四億元，好似好大方咁，實際上唔少金額都用喺寬免商業登記費、利得稅，以及退稅同調高免稅額，反而基層受惠嘅措施大幅縮水。

仲有吖，就算惠及中產嘅措施亦只係得個樣，好似寬免差餉咁吖，話就話由去年寬免兩季增至寬免四季，但寬免額就由去年每季二千五百元減至每季一千元，大部分業主獲得嘅寬免額反而少咗，你話鬍鬚曾係咪蠱惑吖？

好明顯，鬍鬚曾做慣守財奴，但又怕被人鬧涼薄，於是咪玩掩眼法自欺欺人囉。本港貧富懸殊，尤其長者貧窮問題不斷惡化，好多人寄望預算案能夠推出有效措施紓解民困，結果願望再次落空，派糖冇「加甜」不特止，反而「減甜」，難怪被人批評重商輕民，對唔住基層喇。

市民眼睛係雪亮嘅，最新民調顯示唔少市民對預算案感到失望，滿意率只有三成六，而不滿率就有兩成，滿意率淨值為一成七，較去年大跌一成一。受訪市民中，最唔滿意預算案嘅係十八至二十九歲嘅年輕人，其中唔夠一半人支持鬍鬚曾出任財政司司長，證明佢喺預算案賣口乖係冇用嘅。

講多無謂，食多會滯，港府與其浪費時間玩數字遊戲，不如認真諗辦法改善經濟同民生仲好喇。鬍鬚曾自己都識講喇，受到環球經濟不明朗因素影響，加上本地外貿及旅遊業等持續放緩，本港經濟危機重重，未來一年難言樂觀，港府繼續無所作為，一味等運到，遲早食穀種嘅咋。

總而言之，數字遊戲枉自欺，重商輕民惹爭議。鬍鬚曾話香港好多問題都係「人為」造成，其實佢咪就係講緊自己囉，香港之所以坐困愁城，政客有責任，政府有責任，唔通鬍鬚曾就走得甩咩？叮！