城中鏡：過年跟習俗
東華三院日前舉辦新春團拜活動，主席何超蕸同一眾董事局成員齊齊向大家拜年。一眾總理除咗欣賞舞獅外，仲輪流玩接公仔遊戲，搶接由龍獅隊喺高處拋下嘅猴子公仔，寓意迎春接福，氣氛好熱鬧。講起農曆新年傳统，何超蕸話自己好傳統，由細到大都一定跟足過年習俗，唔會喺大年初一洗頭，仲成個正月都絕對唔會買鞋添，佢話忍一個月都唔係好耐啫！
何超蕸過年跟足傳統年初一唔洗頭，兼成個正月都唔買鞋。
黃業光、廖偉麟、蔡榮星、區宇凡、施榮恆齊齊出席團拜活動。
李曠怡感冒發燒戴口罩，但佢唔驚畀人當做「暴徒」。
李曠怡戴口罩唔怕變「暴徒」
轉頭見到總理Jason李曠怡戴住口罩現身，原來佢感冒發緊燒，所以團拜時都不忘拎番張「身體健康」揮春同大家道賀。問佢驚唔驚呢期戴口罩出街有機會畀人誤會做暴徒，佢就笑笑口話唔擔心，因為自己真係病喎。其實係佢西裝骨骨，點睇都唔似暴徒就真。
同場仲有總理楊嘉成、廖偉麟、蔡榮星、馬清揚、前主席施榮恆同前總理黃業光等。楊嘉成今個農曆新年去咗歐洲旅行，而馬清揚同黃業光都去完英國返港，事關要去探「老細」，邊個咁有分量做得佢哋「老細」呢？咪係佢哋啲仔女囉！兩人分別有三個仔女，年紀差唔多又喺英國讀書，所以佢哋有時碰啱就會一齊去英國，又試過探仔女期間抽時間去蘇格蘭一齊揸吓車。
馬清揚仲話風水輪流轉，以前父母當自己係老細，依家就到佢服侍啲仔女。講到過年會唔會唔洗頭，黃業光就透露細個阿媽真係叫佢初一唔好洗頭，但細個邊會聽，洗完頭阿媽都冇佢符喎。
