私人樓宇維修工程近年屢爆圍標，小業主被迫任人魚肉。市區重建局早前宣布會斥資五百萬元推出「樓宇復修促進服務」先導計劃，三招齊下反圍標。除咗會有專業人士提供維修工程估價供業主參考外，仲設電子招標平台處理標書，確保投標者身份保密，減低招標過程中受到操控。圍標問題日趨嚴重，市建局主席蘇慶和出招算係正視問題，但有團體質疑計劃嘅申請門檻過高兼名額只得五十個太少，「杯水車薪」。如果蘇慶和真係幫小業主，要好好諗吓點改善計劃！
