政壇：阿Ann二創歌無畀版權費
喺前日公布嘅財政預算案，財爺鬍鬚曾引用粵語歌曲《憑著愛》嘅歌詞寄語港人，令立法會議員阿Ann蔣麗芸好感觸，一時興起跟風大玩二次創作，尋日就喺社交網站上載咗由佢主唱嘅二次創作版《憑著愛》。早前特首梁振英在公開場合唱《喜歡你》並上載到社交網站，於是被質疑侵權，事後要繳付六百元曲詞版權費，加上現時立會仍在審議《二○一四年版權（修訂）條例草案》，但阿Ann今次玩二次創作並無付版權費。
蔣麗芸二次創作歌曲《憑著愛》並無支付版權費。（互聯網圖片）
阿Ann認無支付曲詞版權費，解釋因為喺私人場合錄製，同埋只係分享畀身邊嘅朋友睇，所以毋須要支付版權費。佢二次創作嘅《憑著愛》歌詞係關於目前立會嘅開會現況，形容現時議會上多次點算開會法定人數，真係「點到心驚震」，認為「議事規則終有一日會修改」，議會會有出路。佢話歌詞係同事創作，而佢因傷風聲沙所以錄咗幾次先成功。
