政壇：受惠流錯會 郭偉強陪產
前日立法會「甩轆」點錯人數流錯會，令工聯會議員郭偉強可以專心陪太太產子，而佢個仔喺尋日下午一時半終於出世，重七磅幾，仲重過爸爸出世嘅時候，係立會第一個「猴子」，認真識揀時候出世。郭偉強話今次可算不幸中之大幸，雖不幸流會，但大幸係可以喺產房陪伴太太，自此佢亦下定決心，將來有機會再做爸爸，就算搞到流會都會陪產喎。
郭偉強
郭偉強囝囝依家全程要黐住媽媽。（受訪者提供）
郭偉強話太太前日下晝已入院，夜晚佢亦執好「走佬袋」，但未生得，太太就叫佢返屋企休息，直到尋日朝早五時半就收到醫院電話通知，指佢太太可入產房，八小時後ＢＢ就出世喇！初為人父，佢話心情緊張、興奮、開心，ＢＢ仲未改名，希望將來聰明伶俐、正直同孝順。今次陪產後，佢強調會更愛太太。
佢又話依家ＢＢ全程要黐住媽媽，加上醫生要做檢查，佢又要搬物資上病房，到傍晚都未正式抱過ＢＢ，大嘆生完仲有好多工作要做，深感男士只得三日侍產假真係唔夠，睇嚟爭取更多男士侍產假係佢未來首要任務。
