政府官員定時會到區議會交流，教育局局長「吳得掂」吳克儉尋日到九龍城區議會，分別同區議員同一班九龍城區小學校長見面，但遇到十名民協成員狙擊。民協除咗要求取消小三全港性系統評估（TSA），仲反對中小學生學習認同讀簡體字。民協成員準備咗請願信同一塊用簡體字設計嘅獎狀，但吳得掂只係接咗請願信，冇接收獎狀。佢透過新聞秘書回應，話獎狀有冒犯同侮辱性，強調局長尊重同樂意接受團體表達意見，但就唔認同侮辱性手法喎。

吳克儉只肯接收民協請願信，但唔肯接收寫有簡體字「閱讀之星」嘅獎狀。

吳得掂早前自爆月讀三十本書，所以民協以此為題，喺獎狀上指吳得掂係「閱讀之星」。另外，獎狀上分別寫上「唔肯廢除TSA　壓迫細路好可悲」同「推行認讀簡體字　荼毒兒童極無恥」。對於獎狀被指有侮辱成分，民協當區區議員黎廣偉就話唔覺得獎狀有侮辱性，唔明白局長點解咁講，佢仲話局長應接受批評。究竟係吳得掂唔夠「寬宏大量」吖，定覺得話佢係「閱讀之星」感侮辱呢？

第一手消息請下載on.cc東網iPhone/iPad/Android/Windows Phone Apps