政壇：郭榮鏗縮骨 疏離法界
喺農曆大年初一晚至初二凌晨發生嘅旺角暴亂，暴徒掟磚、掟雜物、縱火同襲擊警員，違法暴力行為令人髮指，各界齊聲譴責暴徒。由多名資深大律師組成嘅公文袋，雖然有發聲明譴責暴力行為，但就將矛頭轉向政府，指政府對街頭小販問題處理欠佳而引發成暴亂，仲為暴徒提供法律支援。不過，本身為公文袋黨員嘅立法會法律界議員郭榮鏗就偏偏「隱形」無聲無氣、冷眼旁觀，外界有聲音直斥佢縮骨、枉為法律界代表。
公文袋對旺角暴亂發出嘅聲明為人詬病，該黨成員為暴徒提供法律支援更令外界咋舌。但有公文袋背景、又係大律師嘅郭榮鏗就一直無就旺角暴亂事件表態，不禁令人質疑佢究竟係咪認同公文袋嘅立場？抑或係怕企喺公文袋一方，會得失法律界及被批評同公文袋一樣愈嚟愈偏離法治、唔再以法論法，最後導致流失選票？
再者，郭榮鏗作為每月領取超過九萬三千元薪酬的法律界議員，喺旺角暴亂咁大是大非嘅事件上竟然唔敢出聲，既唔力撐自己所屬政黨，又唔代表法律界表明立場，唔通想明哲保身？
版權草案唱反調
不過，就算郭榮鏗繼續縮埋，法律界對佢嘅不滿相信都只會愈燒愈烈。皆因早前大律師公會已經發表立場書，直指立法會應該將《二○一四年版權（修訂）條例草案》袋住先，但係郭榮鏗竟公然與大律師公會唱反調，代表網民就版權修訂條例提出修訂，要求政府同版權業界進一步豁免網民侵權行為，被大律師公會批評為「綁架」主體草案，迫使他人讓步。
郭榮鏗同法律界明顯已經愈行愈遠，而資深大狀圈子中，亦都有聲音認為公文袋愈嚟愈偏離法治精神，應該搵個中立而具有分量嘅人出任立會法律界代表。過去嘅法律界功能界別選舉亦有事務律師挑戰公文袋嘅壟斷地位，就連香港律師會會長熊運信日前都明言，希望有事務律師可以代表佢哋。既然郭榮鏗都被指代表唔到法律界的聲音，倒不如自行辭職、退位讓賢好過喇！
