一年開支十四億 難民問題淪黑洞

新一份財政預算案係咁講嘅，下一財政年度涉及假難民嘅開支達到至少十四億元，遠遠高於本年度嘅六億四千萬元，其中淨係提供人道援助嘅開支就達到八億三千萬元，激增一點五倍，問你怕未。

由於假難民愈來愈多，導致保安局開支大增三成七，相關人手亦由一百九十八個增至二百一十六個，新增職位包括一個首長級及十七個非首長級；而入境處亦要增加一百八十一個非首長級職位及兩個首長級職位，其中一個新增首長級職位就係特別為招呼假難民而設，條數都幾襟計o架。

好明顯，假難民問題已經淪為本港公共財政嘅大包袱，負擔一年比一年沉重，再咁落去，港府就算有金山銀山都唔掂喇，何況香港本身問題多多，港府有錢都應該先照顧港人喇。試諗吓，如果將十四億元用嚟替有需要嘅公屋戶交租，可以幫到幾多人？港府應使嘅唔使，唔應使嘅就亂咁使，簡直豈有此理。

假難民白食白住，港府請客，公帑埋單，納稅人真係冤哉枉也。鬼叫官僚無能咩，搞到香港好似無掩雞籠咁，人蛇來港仲密過個人遊。當局最新數字顯示，去年被捕或截獲嘅越南及非華裔非法入境者分別為二千二百幾人及一千五百幾人，兩者升幅都超過九成。偷渡潮愈演愈烈，假難民愈來愈多，港府再唔撥亂反正，遲早成為一個財政黑洞咋。

係人都知，假難民問題唔止成為沉重財政負擔，仲成為社會治安嘅計時炸彈。涉及假難民嘅罪案幾乎仲厚過電話簿，傷人、襲警、販毒、強姦、搶劫、收數、打黑工、刑事恐嚇等五花八門，無法無天。最得人驚嘅係，部分本港土生土長嘅南亞人更加成為假難民嘅寄生體，專門搵同鄉替黑幫「做嘢」，咁搞法，香港嘅治安及安定指數有乜法子唔跌到阿媽都唔認得吖。

香港淪為「難民港」，人蛇天天來，犯案日日有，負擔年年增，想唔死都幾難。難為北大人仲話有信心保持香港繁榮穩定喎，吹水就得。

禍福無門，惟人自招，假難民尾大不掉，港府早前承諾檢討機制堵塞漏洞，唔好講完就算吖。如果香港繼續中門大開，何止財政負擔年年增加，成個香港隨時陸沉都似，叮！