經濟寒冬，令商界苦不堪言。中華廠商聯合會日前舉行新春團拜，做高檔包裝印刷嘅紙品包裝業委員會主席Ken何偉權就呻話，舊年生意係佢入行三十七年嚟首次蝕本。不過，咭片皇董事總經理Tony鄭重科就笑呵呵，事關每逢經濟唔好，好多公司寫字樓大搬細，信紙、信封同卡片都要再印過，令佢成為少數經濟不景嘅得益者，真係有危自有機。

何偉權（左）同鄭重科（右）都係做印刷，但生意一冷一熱。

余德明（左起）、史立德同蔡龍威都希望經濟寒冬快啲過去。

李秀恒（圖）到首爾旅行不忘偷師，考察具創意嘅貨櫃箱商場。（受訪者提供）

貨櫃箱商場。（受訪者提供）

Tony話舊年底其公司開始多生意，原因係企業縮皮，佢哋一向喺網上接訂單，所以收費較平，好景時客戶唔多計較，但不景時就識得慳錢搵佢哋嘞！至於初嘗虧蝕滋味嘅Ken就話廣東道好多名店係佢客戶，形容佢盤生意係零售業嘅寒暑表。

威馬電器創辦人蔡龍威亦大呻生意難做，會董余德明更加索性賣咗間廠，現金揸手好過。廠商會副會長史立德就希望油價快啲上升，帶動全球股市同經濟重拾升軌。

李秀恒推介貨櫃商場

轉頭見到廠商會會長Eddy李秀恒，佢過年時同家人去韓國首爾玩，見到好多嘢值得香港參考，包括一個設計相當有創意嘅貨櫃箱商場。Eddy認為香港有好多暫未發展嘅土地，可多多利用設置呢類概念商場。一場到首爾，梗要去服裝批發勝地東大門行吓，Eddy忍唔住批評政府，業界多次建議推動特色行業批發市場，如長沙灣時裝城、紅磡珠寶城，但政府態度欠積極，盼政府快啲做實事喎。

第一手消息請下載on.cc東網iPhone/iPad/Android/Windows Phone Apps