政壇：搞搞政：中總換屆兩強之爭
中華總商會將於年底換屆，曾任會長嘅永遠名譽會長兼新華集團主席蔡冠深有意翻閹做多一屆，令今次改選氣氛變得微妙。消息人士話經過大半年嘅角力後，現時牌局係三人競爭嘅局面，包括蔡冠深、副會長莊學山同王國強。消息又話若三人執意競選到底，最終就要一眾老會長（永遠名譽會長）協商決定，以免傷和氣。
消息話中總換屆一向唔係一場選舉，由邊個做會長基本上係論資排輩。現時中總共有八位副會長，排第一位嘅袁武已確定唔會爭，下一屆將會退任。排第二嘅李德麟亦考慮唔再做副會長，所以莊學山成為升呢做會長嘅第一位副會長。至於有意爭取上位嘅王國強則排行第七位。消息人士形容王國強做過廣東社團總會主席，喺社團之中有一定地位，所以爬頭升呢亦無可厚非。
王國強澄清無意競選
中總會長之位很搶手，同爭取躋身下屆全國政協常委不無關係。今屆政協改選喺一三年舉行，當時港區全國政協常委競爭好激烈，原本係熱門人選嘅蔡冠深臨尾大熱倒灶，全程積極爭取嘅王國強亦同常委寶座擦身而過，故此兩人好大機會捲土重來。雖然下次政協換屆仲有兩年時間，但事先搶佔有利位置同政治舞台，對到時爭取曝光機會相當重要。
但本報向王國強查詢，佢否認有意爭做中總會長，形容改選會長同佢無關，事關論資排輩，有排先輪到佢喎！佢又話做會長不單要出錢出力，仲要付出好多時間，現時佢已退休，仲讀緊書，有時間寫論文好過喇！佢再三強調到目前為止無諗過選會長，仲要本報幫佢澄清喎！如果真的如此，現時豈不是剩低蔡冠深同莊學山兩人之爭？隨着換屆逼近，相信局勢將會更加明朗化。
