政壇：內地唔減電費 無計可「施」
經濟唔好，商界怨氣特別多，喺內地開棉紡廠嘅中華廠商聯合會永遠名譽會長Irons施榮懷都一肚子苦水。Irons話佢間廠嘅電費佔生產成本五成以上，但係內地近十年嚟從未跟隨國際油價下跌減電費。佢呻話油價跌冇理由唔減電費，否則企業又有乜嘢競爭力呢？
施榮懷
Irons話內地嘅電力市場仍未開放，無論國際油價升至每桶一百四十幾美元，抑或跌到二十八美元，包括民生同企業用電嘅電費都冇郁過，好唔合理。佢舉例話，台灣嘅每度電費相當於六、七角人民幣，但係內地超過一元人仔，勁削內地設廠企業競爭力。遲啲佢將向內地有關部門提案爭取減電費。不過咁，香港奉行自由市場經濟，但係油公司都冇緊貼油價下跌而減油價喇，何況內地電力市場仍未開放呢？Irons要努力爭取，唔好輕言放棄。
