本港多間大專院校學生爭取修訂《大學條例》,取消特首擔任校監必然制,末代港督彭定康本周一喺外國網站發表《學術精神的落幕》文章,提及當年在港出任香港各間大學校監時,曾考慮辭任卻不獲批准。教育局尋日就發稿反駁,直指喺九四年彭定康會同當時嘅行政局,一同確立時任港督擔任校監必然制,認為彭喺二十多年後發表文章提出論點,係完全罔顧事實嘅行為。

彭定康文章又話,自一四年佔領行動後,內地政府指示港府要喺各間大學挑起事端,教育局發言人批評,此說法毫無事實根據,純屬無中生有,特區政府深表遺憾。至於文章提及學術自由同院校自主方面,教育局發言人引述香港大學校長馬斐森舊年嘅一份演詞,稱認為本港院校擁有學術自由,但因屬政府資助機構,唔能夠完全擁有院校自主,強調呢個問題係全球均有出現,非純粹本土問題。

特區政府重申,學術自由係香港一直推崇嘅重要社會價值,受《基本法》保障,更係香港高等教育界賴以成功嘅基石,特區政府亦一直致力維護學術自由同院校自主。彭定康係校監必然制嘅始作俑者,依家「忽然偉論」,話佢唔係想搞風搞雨都無人信,莫非佢仲幻想自己係港督,可以對香港教育制度指指點點?

第一手消息請下載on.cc東網iPhone/iPad/Android/Windows Phone Apps