政壇：新民黨小花棄戰會計界
盛傳前會計師公會主席、新民黨趙麗娟將會出選下屆立法會選舉，爭奪現時由泛民所擁有嘅會計界議席。據了解，已經有好多人游說趙麗娟出戰，奈何佢本人意願唔大，根本無興趣進入議會咁困身。唔知新民黨會唔會改派有會計師背景嘅小花出選，以增勝選呢？
新民黨多小花都唔係新鮮事，好似黨主席葉劉淑儀愛將、大律師容海恩咁，實行要學識與外貌並重。其實上任做離島區議員冇耐嘅Sammi傅曉琳都一樣，除咗係會計師之外，仲自爆比「娜姐」周秀娜早出道做模特兒添！但佢一聽到出選會計界就耍手兼擰頭，謙稱自己資歷唔夠，絕對無可能參選立法會會計界選舉咁話。
其實早喺十幾年前，Sammi讀緊大學時就有幫報章、時裝雜誌等拍攝硬照賺外快，但因為無意向娛樂圈發展，加上中介公司食水深賺得少，所以就無再做，專心向會計師之路進發喇！難得有專業攝影師、化妝師配合，為自己青春留倩影，點知Sammi竟然話搵唔番批相，係咪怕醜作個藉口收埋珍藏唔肯分享？
傅曉琳受街坊歡迎
Sammi喺選舉前已經辭去會計師工作，雖然會計師工作日夜顛倒，但佢就話區議員同會計師一樣咁忙，皆因仲未熟習議會工作。佢目前仲未有議員辦公室，只能以街站方式服務居民，而且居民又以中產人士為主，搵佢幫忙嘅個案其實唔多，反而有唔少叔叔搵佢傾偈，講吓區內事務咁，睇嚟女性議員真係特別受歡迎，又容易同居民打開話題。就咁睇，淨係區議員工作已經夠晒忙碌，睇嚟，Sammi真係唔會分身進入立法會嘞！
