「東施效顰」嘅典故，相信大家耳熟能詳，醜女本來想模仿美女，結果弄巧反拙，自暴其醜，成為千古笑話。咪以為只係講古咁講吖，現實中確實有咁嘅例子o架。

好似施政報告致謝動議咁吖，本來係港英時代嘅產物，港督每次發表施政報告後，立法局例牌表示多謝，只係一種禮儀啫。估唔到回歸後立法會照辦煮碗，年年提出施政報告致謝動議，可惜同人唔同命，十居其九以否決收場，今年亦唔例外，致謝變成受辱。

講起真係羞家，回歸以來，歷任特首總共發表咗十九份施政報告，其中十三次致謝動議不獲通過，今屆政府四份施政報告更加食白果添。咁都未算吖，辯論致謝動議過程炮聲隆隆，立法會好似戰場咁，唔止達唔到致謝效果，港府反而成為箭靶，畀反對派政客乘機狂插，唔衰攞嚟衰。

所以話，傳統未必就係好嘢，尤其係殖民時代遺留落來嘅政策，唔係話想學就得，有啲嘢係港府永遠都做唔到嘅。以前港督代表英女王管治香港，一言九鼎，冇人敢挑戰管治權威，加上當時立法局議員全部委任，自己人捧自己人，致謝動議梗係年年通過喇。依家就唔同咯，特區政府弱勢，動輒得咎，加上施政甩甩漏漏，烏龍百出，反對派根本唔會同你客氣，致謝動議唔被否決至奇吖。正如有人話齋，港府與其年年受辱，不如要求取消致謝動議好過喇。

冇錯嘞，發表施政報告係特首嘅分內事，根本唔需要致謝。相反，如果施政報告冇料到，唔止唔值得致謝，仲要向市民道歉添。好似今年呢份施政報告咁吖，雖然巨細無遺，洋洋灑灑，可惜唔係翻炒冷飯，就係望梅止渴，結果劣評如潮，成為歷來最低評分嘅施政報告，你話值唔值得致謝吖？唔怪得連建制派議員都怨聲四起喇。

再講吖，今時今日立法會拉布成災，議題嚴重受阻，唔止影響工程進度，連民生項目都受到影響，議員有咁多正經嘢唔做，反而浪費三日時間，嘥咁多口水討論施政報告致謝動議，簡直本末倒置，九唔搭八。有人曾經提議將致謝動議改為「察悉動議」，亦有人建議索性改為「支持動議」，其實計太一叮話齋，無論點樣改變都係換湯不換藥，何必自己呃自己呢。講到底，東施就係東施，就算點樣模仿，都冇可能變成西施o架，叮！