政壇：皮褲黑超上身 葉劉變「女殺手」
行政會議成員兼立法會議員葉劉淑儀尋日身穿黑色皮褲，腳襯一對長靴現身立法會，獲另一立法會議員蔣麗芸大讚有型，話佢好似「女殺手」。葉太隨即自爆，原來呢條皮褲係喺十三年前做緊保安局局長、推緊《基本法》第二十三條立法時買落嘅，又憶述當年佢一身黑皮褸、黑皮褲同戴黑超嘅造型，畀反對二十三條立法嘅人批評佢「寸」同「挑釁」，之後佢只敢齋着番條皮褲，唔敢再襯埋件黑皮褸同黑超。
葉太當年成日戴住黑超出席公開場合，被人批評佢「寸」同「挑釁」。 （資料圖片）
葉太尋日着住嘅黑色皮褲，原來喺十三年前買落嘅。
葉太又為當年經常戴黑超出席公眾場合辯解，話年輕時面對猛烈陽光，唔戴番副黑超好好保護眼睛，老咗好容易有白內障，叫大家體諒吓，「見到人戴黑超唔好隨便話人」。其實葉太當年亦講過，自己對眼好敏感，畀陽光曬得多就會流眼水，一旦畀人誤會佢因為要推二十三條而推到喊就唔好嘞！
