政壇：搞搞政：公文袋偏離法治 大狀界恥與為伍

搵中立有分量嘅人參選

本身係版權法專家嘅大律師公會主席譚允芝尋日出席電台節目時，就直斥有人以政治角度、非法律角度睇問題，矛頭疑指向公民黨。

消息指出，喺資深大狀圈子中，愈來愈多人不滿公民黨嘅表現，質疑佢哋愈嚟愈偏離法治，唔再以法論法，覺得應該搵個中立啲同更有分量嘅人，出任法律界喺立法會嘅代表，或者游說本身唔係咁激嘅郭榮鏗退黨。不過做起上來先知困難，事關稍為中立啲又有分量嘅法律界人士，絕大部分都只顧𢱑銀，唔會有時間同興趣搞政治，至今都暫未搵到合適替代人選！大狀界嘅新發展，對公民黨黨魁梁家傑及郭榮鏗嚟講都威逼力十足。

講到大律師公會同公民黨嘅分歧，始於二○一七年政改方案，公會發表立場書直指「公民提名」超出《基本法》規定，但公民黨堅持死撐「公民提名」，其後爆發佔領行動，公會發聲明強調市民必須遵守法庭嘅刑事禁制令，但公民黨中人卻繼續鼓吹市民集體違抗禁制令，聲稱犯法後自首就無損法治精神等，令公會中人相當不滿。到近日嘅版權法爭議，來自公民黨嘅法律界議員郭榮鏗代表網民提出修訂，要求政府同版權業界進一步豁免網民嘅侵權行為。咁樣愈行愈遠、愈來愈激嘅公文袋又真係好難代表大律師業界噃。