政壇：港大校委會 租場撞板

據悉，校方首選係港島區嘅會議場地或者酒店，不過，我哋聽聞多個場地都對港大「大駕光臨」耍手擰頭，擔心再遇學生衝擊，有錢都唔敢賺，所以至今遲遲未決定開會地點。

睇番港大校委會會議，自從去年首次發生學生衝擊校委會及禁錮委員風波後，會場就由大學本部校園鈕魯詩樓移師至沙宣道嘅香港賽馬會跨學科研究大樓，貪後者對校園嘅影響細啲。

但沙宣道依然係校園，好似上次咁，警方始終礙於「校園自主」，唔敢提前進入校園布防，因此兩次衝擊都要等港大報警，警方先至可以進入校園維持秩序，令衝擊及混亂持續過久。

多間酒店耍手擰頭

上月底校委會主席李國章會後須由警員護送離開後，校方已決定索性將會議場地移師校園外，但連日向港島區多個會議場地或者酒店查詢，可惜個個都耍手擰頭，唔知係咪怕咗港大學生同聲援者，前車可鑑，再加上經過旺角暴亂，業者亦擔心租場出去恐遭遇大規模衝擊，到時真係唔知賺定蝕。

結果，港大至今仍碰壁，會議喺邊度開，仲未決定，聽聞校委會成員收到嘅開會通知，會議地點至今仍然未確定。校方接受查詢時亦未有回應。