人蛇天天來 犯案日日有

呢，經過東方報業集團鍥而不捨報道之後，假難民問題終於引起社會廣泛關注，有港區人大代表及政協委員甚至首次將呢個問題提升到國家層面，計劃趁下月北京召開「兩會」期間，向中央建議加強兩地情報交流、聯合執法及打擊人蛇集團喎。

正所謂，遲到好過冇到，建制派要求內地協助打擊假難民，雖然慢咗幾拍，但總好過繼續袖手旁觀，坐視問題不斷惡化。正如有立法會議員話齋，兩地當局合作打擊假難民，效果必定遠遠勝過港府單方面堵截，如果中央肯出手，短期內就可以令本港假難民人數減少一半添。

係人都知，好多假難民都係先去內地，然後轉來香港，尤其係南亞裔人蛇，喺人蛇集團安排之下，簡直如入無人之境。之所以搞成咁，港府中門大開固然要負主要責任，而內地當局放任假難民自出自入亦係主要原因之一。有人批評內地當局靠害，將香港當成「排毒」嘅「馬桶」，唔係冇理由o架。

即係咁，如果假難民來港只係打黑工，都仲係小事，弊在好多假難民作奸犯科，販毒、打架、搶劫、勒索、非禮等等，有啲甚至淪為黑幫僱傭兵，無惡不作。呢嗱，尋日深水埗有位夜歸男子又畀南亞賊人搶去銀包，元朗亦有一名酷刑聲請印尼女子涉嫌藏毒被捕，罪案無日無之，毒瘤不斷惡化，唔驚就假。

小數怕長計，過去五年南亞裔人蛇激增五倍，其中九成九以上係假難民；去年持行街紙涉及刑事罪行而被捕嘅非華裔人士達一千一百多人，比前年飆升六成七；而今年初至今，涉及假難民嘅刑事罪案已有四十幾宗，顯示問題正不斷惡化，再咁落去，香港想唔變成罪惡之城都幾難。

俗語話，一個巴掌拍唔響。面對源源不絕嘅假難民，無論港府點樣加快審核程序，執法部門點樣加強堵截，如果內地當局唔肯配合，始終都係嘥氣。不可不知，目前淨係廣州就有二十萬非洲裔人士，由於近年內地經濟下滑，好多假難民紛紛南下搵食，當局再唔採取有效措施，香港遲早被踩沉都似。中央都唔想見到咁嘅結果o架，係咪！