城中鏡：電子商踩過界 「豪」搞寵物市場
喺呢個世代，叫BB嗰啲其實係囡囡，畀人當正BB嗰啲其實係貓狗，寵物市場潛質大到呢。連信佳做開電子產品，依家都搞呢瓣。佢哋六月會推電子狗帶同電子餵飼器，裝埋個手機App，畀啲狗奴貓奴返工時，都可以Check住佢哋「主人」幾時食幾時瞓、跑咗幾多步，度埋營養餐單都仲得。
吳自豪話傳統淨做電子產品前景一定差，要諗新出路。
何止咁，信佳仲搞埋寵物產品網站「Espetsso」，兼出自家品牌Brabanconne狗糧。佢哋嘅主席吳自豪話外國寵物食品牌子雖然出名，但好似冇考慮過中港同外國生活環境好唔同，所以啲中港寵物過肥。今時今日唔止奶粉，連狗糧都有本地配方！
