仁濟醫院董事局尋日舉行新春酒會，仁濟主席Vanessa林煒珊喜上眉梢爆料話，華懋集團應承捐贈荃灣芙蓉山一塊六萬五千呎農地畀仁濟，佢形容係封大「利是」，可以話係任內最大收穫，仲賣關子話，好消息會陸續有來喎！Vanessa話呢幅地距離荃灣仁濟醫院大約五至六分鐘車程，華懋方面只係要求唔可以轉讓出售，其他用途並無特別限制。

林煒珊（右）握手感激龔仁心捐地善舉。

孫蔡吐媚（左起）、蘇陳偉香同嚴徐玉珊着得喜氣洋洋去團拜。

馮卓能家有添丁之喜。

目前華懋董事局已通過有關捐地方案，現正等候龔如心遺產管理人同意，即可同仁濟醫院簽署諒解備忘錄。待完成所有程序後，仁濟將研究土地用途，包括係咪用作開設老人院或興建骨灰龕等設施。華懋集團主席龔仁心都有出席酒會，但就唔肯多講。仁濟歷屆總理聯誼會主席蘇陳偉香話，今次獲贈土地令仁濟未來發展更有潛力。

馮卓能追到金叵羅

同場仲有仁濟副主席嚴徐玉珊同總理孫蔡吐媚等高層。今個農曆新年香港天氣又凍又濕，嚴太同家人去咗布吉避寒，孫太就去新加坡同馬來西亞玩。嚴太今次出遊帶埋十四個月大嘅孫女，難怪佢講起旅程就開心笑喇！佢嘅新抱已佗緊第二胎，明年過年就更加熱鬧。家有喜事嘅仲有仁濟副主席Clement馮卓能，已有兩名女兒嘅Clement啱啱添丁，囝囝差唔多滿月，所以過年期間喺屋企做湊仔公。佢笑笑口話依家有仔有女，可以收工喇！

第一手消息請下載on.cc東網iPhone/iPad/Android/Windows Phone Apps