政壇：財爺傳削免租 幫建制派趕客

據悉，今個財政年度稅收超乎預期，當中薪俸稅同利得稅因為係收緊上個財政年度嘅稅款，當時經濟情況理想，所以稅收唔錯。

舊年股市又經歷爆升同暴力救市，大起大落令印花稅較預期高，但賣地成績較預期唔太理想，地價收入就減少。不過，由於政府宣布將約四百五十億元投資收入撥入「房屋儲備金」，所以最終盈餘對比舊年預期嘅三百六十八億元差唔多。

鬍鬚曾出名係「守財奴」，尋日有消息傳佢唔再推公屋免租。記得舊年政府亦傳有意取消公屋免租，但因多個建制派政黨向特首陳情，所以先決定保留，最終只係取消富戶免租。據了解，政府當時亦向建制派政黨表明，只此一次，下不為例，所以鬍鬚曾今年就大條道理取消公屋免租，但佢就會保留退差餉，算係令公屋以至私樓業主都可以受惠。

影響選情勢害人害己

建仔嘅立法會議員鍾樹根就極之不滿，形容削公屋免租等於幫該黨「趕客」。工聯會議員黃國健就直言，今年係選舉年，取消公屋免租唔係太好，佢質疑舊年傳出取消公屋免租，只係因為經濟好、全民就業，但今年經濟有下行風險，推行公屋免租等逆周期措施，可以保持本地消費。白鴿黨議員胡志偉亦表明會反對建議，意味迫使溫和泛民加入埋「拉布」行列。

睇目前形勢，無論泛民或建制政黨都擔心削公屋免租會令立會選情受影響，如果鬍鬚曾真係一意孤行，各黨肯定反枱，鬍鬚曾隨時火燒身。