政壇：搞搞政：田二少歌喻暴亂 「源」來斷章取義
立法會尋日最後一日辯論施政報告致謝議案，唔少立法會議員都提到農曆新年期間發生嘅旺角暴亂。新民黨議員「田二少」田北辰發言時就以「家暴」比喻旺角暴亂，又大顯歌喉唱出英文歌《Blowin' In The Wind》，憑歌寄意叫政府反思。不過，政制及事務局局長譚志源就笑田二少將首歌斷章取義，仲叫佢要好好留意歌詞。
原曲反戰宣和平
田二少唱出其中兩句歌詞︰「How many times can a man turn his head, and pretend that he just doesn't see？（多少次轉過頭去假裝看不見）」，話「家和萬事興」，一個家「父慈子孝」梗係好，但發生家暴後除咗互相指摘、大義滅親，如果唔修補關係嘅話，事件仍會再發生，覺得除咗「治亂世、用重典」，發生家暴時亦應尋求協助，了解事件真相，故建議當局要由有公信力嘅一群人去就暴亂進行獨立檢討。
但譚志源話曾經翻查網上嗰首歌嘅資料，發現首歌係宣揚和平嘅反戰歌，如果用嚟批評旺角暴亂事件都正確，但引用有關歌詞就係斷章取義喎。
