政壇：郭偉強追數好勞氣

喺議會內表現較文靜嘅郭偉強喺致謝議案辯論中連珠炮發，先狠批年初一晚至初二凌晨發生嘅旺角暴亂破壞社會穩定，如果不予以嚴厲譴責只會變本加厲，可能會再爆發甚至行動升級。提到今年施政報告，佢就批評喺勞工政策上「交白卷」兼係「四無」，包括無提及將勞工假期增至十七日、取消強積金對沖機制及最低工資一年一檢；標準工時第二輪諮詢亦只係討論合約工時，即等同唔會就標準工時立法。交白卷都不特止，施政報告仲話未來幾年建造業欠缺人手，有必要輸入外勞，激到勞工界紮紮跳。

斥「追埋一份最易」

之後佢仲喺發言中點名提李卓人，話當年如果唔係工聯會努力爭取將標準工時同取消對沖機制寫入特首競選政綱，依家根本唔存在李成日掛喺口邊嘅追數問題。佢愈講愈勞氣，話因為工聯會嘅努力，李先可以抽水，埋位追埋一份，又指馬後炮永遠都係最容易。

郭偉強一係唔講，一講就講咗足足半個鐘。佢之後講笑話，去到後半段已經唔係好夠氣，返到去又要飲番啲湯水補吓喎。