城中鏡：高佬賢睇中醫谷生仔
農曆新正頭，最緊要利利是是！一班議員放完新春假期後，尋日難得去到立法會，梗係大派利是，求番個應節好意頭喇！超恨生仔嘅漁農界立法會議員「高佬賢」何俊賢派咗兩年利是，但都仲未有小朋友幫手逗番幾封，原來有難言之隱，仲透露已經同埋太太一齊去睇中醫，補身谷生仔！
何俊賢恨生仔，要太太日日飲中藥及以薑水浸腳補身。
林健鋒袋到全套西裝都係利是，最少一百封。
單仲偕帶舊相簿到立法會與記者分享，其中有他與妻子舊照（小圖）。
高佬賢過年前，曾經透露生仔有困難，因為夜晚同太太分房瞓，唔通感情出咗問題？原來只係因為佢夜晚放工太攰，經常唔小心喺梳化瞓咗，搞到太太詐晒型，質問佢做咩唔入房瞓，咁搞法，好難唔影響「造人」。
林健鋒勁逗利是
其實高佬賢不知幾恨生仔，佢見到黨友陳恒鑌（Ben）生完一個又一個，即刻向對方請教生仔秘訣，Ben就介紹咗個中醫畀佢識，高佬賢於是急急腳同太太去求診，結果中醫就要佢哋各自執番劑中藥補身，最好就盡量日日飲，太太仲要另外煲薑水浸腳，佢太太飲咗三個月左右，手腳真係開始暖啲喇，睇嚟相當有效喎！
商界議員林健鋒（Jeffrey）都袋到全套西裝都係利是，最少有一百封，佢話有時都會摸吓後褲袋，確保無跌嘢喎。不過，佢派利是之餘，都仲有逗利是，皆因港大校委會前主席梁智鴻係佢喺聖約瑟書院師兄，早前遇到梁太，都有派利是畀佢。
議員單仲偕今年鐵定離開議會，他多年前曾被冠以「立法會方中信」稱號，但近年已經被紡織及製衣界議員鍾國斌取代。佢尋日就帶同相簿到立法會，與記者話，多年最自豪嘅一張相，就係二十八年前擔任葵青區議員時，與街坊到流浮山旅行所攝，相中人還有他的太太。被問及太太是否其初戀，單仲偕立即霸氣話「我未失過戀！」是否意味他認識太太前未拍過拖呢？
