政壇：證券歌王聚首 唱出業界心聲
證券商協會日前新春團拜晚宴，財經界好多相熟面孔現身，金利豐證券研究部執行董事黃德几（Dickie）同耀才證券市務總監郭Sir郭思治呢兩大證券界歌王相遇，唔大展歌喉都講唔過去，結果畀咗好多歡樂大家。
黃德几（左）話，喺證券界佢自認唱歌第三、郭思治第二，應該唔會有人敢認第一。
有「財經界黎明」之稱嘅黃德几話，喺證券界自己認唱歌第三、郭Sir認第二，都應該唔會有人敢認第一；喺依家咁嘅市況，兩個人實行憑歌寄意，合唱一曲《沉默是金》，唱出咗唔少證券界人士今年以來嘅心聲。話時話，證券商協會呢兩任主席都係女性，可見女性喺證券界嘅發展愈來愈重要。
