政壇：孤寒財爺 打爛豬仔錢罌
新一份財政預算案下周三出爐。經濟不景，一個錢當兩個用係常事，據悉，「孤寒財爺」曾俊華（鬍鬚曾）前年已喺內部提出慳錢好橋，無奈部門反彈壓力太大，搞到鬍鬚曾想攬實個錢罌都唔得，最近更要被迫微調政策，變相廢咗慳錢大計嘅武功。
鬍鬚曾之前喺政府內部提出「011」省錢計劃，要求各部門在今個財政年度可以維持開支現狀，但未來兩個年度就要每年省錢百分之一，結果多個前線部門都抱怨「巧婦難為無米炊」。講番「011」省錢計劃，係因應去年長遠財政工作計劃小組報告而出台，各部門由下個財政年度起，每年節省百分之一開支，但每部門開支以數十億至數百億計算，減幅就高達數千萬元至數億元。最近有報道指，醫管局下個財政年度要削減二點五億元。但細看資料，就會發現醫管局只需削減百分之零點五嘅開支。
容許提供新服務代替
不過，計數好美好，真係落到各部門，就煩咯。我哋早前都率先報道過前線部門對計劃嘅反彈，如康文署、社會福利署嘅直屬局長，都趁高官「早禱會」直接訴苦，指部門反映省錢有困難，唔知係咪內部太多怨氣，據聞政府內部早前已發出通告，容許部門不用省錢，但要做新服務，變相增值。
消息人士承認，部分部門因服務性質，毋須削減百分之一，部分更只是削減百分之零點二五，即是原本的一半或四分之一。政府嘅通告亦話，部門可以保留削減嘅開支，但同時亦要提出新服務。鬍鬚曾本來想收繳百分之一嘅款項作中央調配，依家「微調」之後，等於豬仔錢罌冇進帳，佢喺預算案睇怕又要揸緊啲都似。
