城中鏡：猴年投資有道
保良局日前舉行新春團拜，董事局一班靚太都喜氣洋洋現身互道恭喜。見到從事金融業嘅保良局總理譚毓楨（Jenny），梗係要請教佢猴年投資之道啦。Jenny話，雖然港股跌多升少，但危中有機，事關好多股票已經超賣，散戶可以伺機買藍籌股長揸，想短炒嘅就咪搞，希望今年可以先苦後甜喇！
譚毓楨（左）及鄧宣宏雁（右）希望今年經濟苦盡甘來。
陳欽勉拎住手機與人分享保良局Facebook專頁。
郭羅桂珍（左）快將升呢做保良局主席，何芷韻（右）戥佢開心。
同場仲有保良局副主席郭羅桂珍、總理鄧宣宏雁（Emily）及何芷韻（Amanda）。郭太四月將接棒做保良局主席，佢笑笑口話已做好準備。講起零售生意市道，仍然睇實公司營運嘅郭太話，未來打算改變大店策略，以小店形式分散滲透社區，希望可以度過經濟寒冬。
Amanda帶埋六歲大女Elena去團拜，Elena眼大大又好精靈，盡得爸爸理文造紙行政總裁李文斌及Amanda嘅好遺傳，但Amanda就唔想囡囡出鏡。Amanda話，現時仍然為工作中港兩邊走，希望遲啲可以多啲留港陪三個子女喇。
陳欽勉密篤電話分享專頁
現場仲有保良局行政總監陳欽勉（James），佢拎住部智能電話係咁篤，原來係同人分享保良局新推出嘅Facebook專頁。James話，專頁有好多感人小故事，主要係前線同事及義工嘅所見所聞，冀望藉此散播正能量，同時話畀市民知，保良局做慈善唔止係好巨額、好離地嘅善款數字，而係做緊好落地、具體嘅事。Emily聽到話一定要畀like做專頁粉絲至得。
