港大學生發起抗議李國章獲任命為校委會主席嘅罷課無疾而終，無以為繼下，罷委會更無聲無息解散。發起罷課大會嘅學聯前常委梁麗幗就實行一雞死一雞鳴，轉而協助旺角暴亂事件中被捕嘅港大學生，不過，呢個新起嘅爐灶未必可以搶風頭，仲分分鐘燒埋自己都收唔到科！

罷委會搞嘅罷課冇乜學生參加，圍堵校委會又遭到社會全方位批評，行動接連失敗，喺第四次罷課大會後，梁麗幗都惟有宣布暫緩罷課行動，當晚學生否決了十日內與李國章對話，但選出另外五名學生代表，與一名學生會幹事日後與李國章會面。有罷委會成員承認已經心灰意冷，稱會退下火線。而罷委會拿拿聲煙消雲散，從佢哋嘅Facebook已經半個月冇更新已可見一斑。而梁麗幗則忙於呼籲同學支持旺角暴亂事件中被捕嘅港大學生，早已放棄罷委會嘅事。

校監公投 有頭無尾

講起港大有頭冇尾，近日多間大專院校均按照早前訂下嘅時間表，喺本月就廢除特首校監必然制發起校內公投，唯獨港大學生公投無疾而終。有學生質疑，港大學生會搞起個頭，至今連少少事都做不好，更問學生會除了一次又一次的衝擊失敗外，為同學爭取了甚麼呢？不過，你有你質疑，前學生會會長馮敬恩已經落莊，搵邊個交代呢？睇嚟又係亂完就算數。

第一手消息請下載on.cc東網iPhone/iPad/Android/Windows Phone Apps