民協早前選出新任「女當家」莫嘉嫻,雖然呢個主席去年十一月喺區議會選舉中敗選,失去盤據了十六年嘅九龍城馬頭圍區議員席位,但佢嘅戰鬥心似乎未被擊敗,還有意參加九月立法會選舉,出戰新增一席嘅九龍西選區。不過,若莫嘉嫻真係出戰,咁同該黨另一有意出選該區嘅民協老將譚國僑就要先內部擺平喇!

民協尋日公布該黨內有意參選九月立法會選舉嘅成員名單,莫嘉嫻與深水埗區議員譚國僑都有意在民協老巢九龍西參選。民協現任立法會超級議員馮檢基(阿基)就有意轉戰九龍東或新界西出選,而接替阿基、劍指立法會超級議席的就係深水埗區議員何啟明,而黃大仙區議員施德來就同阿基一樣,有意出選九龍東。

話時話,立法會九龍西選區現任五位立法會議員當中,四個係女人,包括民主黨黃碧雲、民建聯蔣麗芸、經民聯梁美芬及公民黨毛孟靜,三個女人已經一個墟,如果加埋莫嘉嫻嘅話,呢區真可謂女人當道嘅選區。

先決保住九龍西一席

不過,如果莫嘉嫻真係出選,譚國僑可能就要讓路。其實之前一直盛傳譚國僑會出選九龍西以力保民協老巢,或接替阿基挑戰超級議席。譚國僑尋日就話,因為何啟明出選,佢唔想畀人覺得佢同後生仔爭,而佢亦認為先決問題係要保住九龍西一席。而同譚國僑角逐嘅莫嘉嫻就直言民協要「求變」,亦希望可以有新嘅聲音帶入議會。至於佢哋兩個邊個可以代表民協出選九龍西,仲要由民協中委開會決定,遲啲自有分曉。

第一手消息請下載on.cc東網iPhone/iPad/Android/Windows Phone Apps