城中鏡：朱潔儀春節開金口送暖

「港姐畫家」Donna朱潔儀樂做慈善，年初二晚佢同藝人鍾慧冰及形象指導張學潤等一齊出席由深水埗街坊福利會同深水埗區議會協辦嘅新春活動，仲向一眾長者獻唱同派福袋，讓長者們過咗一個熱鬧同溫馨嘅春節。Donna當晚獻唱咗兩首經典金曲，分別係《甜蜜蜜》同《漫步人生路》，現場嘅長者仲打拍子和唱兼讚佢聲線甜美。現場擔任長者卡拉OK比賽評判之一嘅音樂人林慕德亦盛讚Donna歌聲悅耳，令佢受寵若驚。Donna話：「呢區有好多長者、基層市民同獨居老人，我想藉住新春佳節向佢哋送上溫暖，今次反應好好，我都好開心。其實之前原本有朋友約我去泰國旅行，不過為咗呢個活動我都推咗嘞！」