政壇：肥張夠薑入市 發新年財

邊位？就係立法會金融服務界議員「肥老闆」張華峰。佢見呢排個市死吓死吓，初四開市時更再插多七百幾點，經驗話佢知股市應該會「死貓彈」，故當日以162.7元低撈港交所。嗱，尋日個市果然反彈，佢諗都唔使諗就以168.2元即沽港交所，短短兩日就每股賺成5.5元。

肥老闆初四究竟入咗幾多手港交所？雖則佢冇講，但佢出手點會低，若買咗100手（即1萬股，都係使大概百六萬）計，就輕易賺咗5.5萬元；如果佢出手再勁啲，買咗1,000手（即10萬股），就更加係執咗55萬元。

唔止港交所，肥老闆原來早兩日仲揸咗期指，見股市反彈，期指賺咗四百點就急急鬆人。今個新年肥老闆好肥啊！

近排個市弱過藥煲，點解佢仲咁夠薑夠膽入市呢？肥老闆話當個個諗住個市就嚟死時，應該就係反彈嘅時候；同時，當啲大戶頻頻出嚟講嘢話個市會大跌時，就好可能係出口術，又係一個入市信號。