政壇：搞搞政：梁繼昌坐定粒六 莫乃光選情勢危
公共專業聯盟嘅立法會會計界議員梁繼昌同資訊科技界議員莫乃光尋日舉行新春傳媒聚會，言談間提及七個月後所屬界別嘅選情，其中梁繼昌話過去四年間，有多個會計界組織出現，更有無限量資源支援，大搞國情班同平價旅行團去照顧選民，佢其後又提及多名潛在對手人選，包括會計師公會前會長。
有政界中人分析，梁繼昌數嚟數去嘅潛在對手都具有建制派背景，未見有其他路線嘅疑似候選人，愈多建制派背景人士齊齊落場，對於佢選情更有利。
相對於梁繼昌疑坐定粒六，莫乃光嘅選情似乎危危乎。佢分析歷屆資訊科技界選民數目都有變化，任期中段時選民數目最少，但往往去到選民登記截止前都會回升到同之前相若水平。現時距離登記選民限期只剩唔夠三個月，但選民人數只有五千幾人，仍未見回升，暫時比上屆仲要少，加上佢見潛在對手愈見活躍，因此有人質疑對手係咪咁淡定，唔使「吹雞」去催谷登記選民喇！
出師不利煮燶雞
選民人數多就話驚種票，依家人數少又憂慮多多，睇嚟莫乃光真係亂晒陣腳。此外，佢近年喺多項議題嘅立場被指模糊不清，有業界中人質疑佢未有第一時間同業界企喺同一陣線，包括政府提出設立創新及科技局，以及正在審議嘅版權修訂條例草案，似乎佢要有心理準備，到時要慢慢向業界解說立場。
事有湊巧，佢尋日煮「燒烤風味」玫瑰豉油雞，似乎出師不利煮燶雞，唔通預示佢嘅選情都一樣，提早聞到陣(火羅)味？
