政壇：麥美娟當黑破財擋災
尋日係立法會農曆新年後首日復會，工聯會嘅立法會議員Alice麥美娟喺政制事務委員會發表意見時，突然講嘢冇咗聲，仲要委員會主席譚耀宗幫佢將支咪嘅音量再校大啲。原來Alice舊病未除，到尋日下晝仲要失埋聲。唔單止佢有事，連佢兩隻愛犬嘅皮膚敏感都嚴重咗，加埋佢架車都壞埋，搞到新年流流就要破財。不過，佢都好樂觀，認為接二連三嘅事係破財擋災，希望佢病完會行好運啦！
傷風感冒斷唔到尾
原來Alice早喺舊年年尾已經傷風感冒，但一路忙於開會，加埋農曆新年要落區向街坊拜年，不停嗌咪同埋講嘢，搞到喉嚨冇得休息，所以病情斷唔到尾。佢仲話本來朝早喺區內工作時把聲仲未有事，但返到立法會開會就即刻出事。
Alice又話其實佢兩隻「寶貝女」麥糖同麥棗一路都有皮膚敏感，但最近嚴重咗，早兩日帶咗佢哋去睇醫生之餘仲轉埋新藥。佢透露遲吓仲要再做檢查，查吓啲敏感成因。雖然轉新藥嘅使費比之前唔係多好多，但加埋做檢查應該都好重皮吓。
之後佢仲透露埋佢架車嘅右邊車頭大燈、左邊車尾燈，同埋控制燈嘅電腦板都壞埋。不過維修費係幾多，佢就話暫時仲未知，但負責維修嘅師傅已經預告咗筆維修費唔會平得去邊。
我哋早前就幫咗啲政界人士睇過吓佢哋嘅猴年運程，但就冇Alice份。早知佢搞成咁就幫佢睇埋啦，順便幫佢睇埋姻緣，睇吓猴年會唔會有桃花運嘛！
