城中鏡：翁狄森愛女「影後」傳情
珠寶設計師翁狄森尋日為一個攝影比賽做評審，佢透露早前趁名模老婆CoCo蔣怡遠赴英國藍帶廚藝學校進修九個月期間，不時為愛女Uma拍下唔少背影照，以表達囡囡對媽咪嘅思念之情。佢笑言：「依家囡囡兩歲幾，開始識嘢，要佢影相嗰陣會擰歪面，要同佢玩熟咗先會轉塊面畀你影。因為我好忙，媽咪返咗香港就畀晒媽咪湊。」佢又興奮咁話下星期終於有假期，將去郵輪旅遊十天，遊新加坡、泰國、蘇梅等地，並慶祝二人相愛十五周年。
翁狄森一家三口下周享受郵輪假期。
咁有冇教囡囡影相？佢笑言囡囡喺CoCo嘅領導下會擺pose，但囡囡平日較多跟CoCo一同下廚。追問囡囡係咪遺傳咗佢啲手藝？佢就話：「囡囡個樣似我，內心似CoCo。CoCo講可唔可以調轉，我話唔好，咁會太鋒芒畢露，我老婆咁靚。就係唔想囡囡多人追，但囡囡都好慢熱，陌生人搵佢傾偈係唔得嘅。」
