城中鏡：新春贈慶
工聯會為工聯職安健協會義賣籌款嘅維園年宵檔口尋日開張，仲邀請咗會長林淑儀同理事長吳秋北等人撐場，但原先都會落場嘅立法會議員王國興，就因為泛民點人數「拉布」被迫困坐立會而缺席。咁啱行年宵路過嘅學民思潮黎汶洛同周庭，即興踩場「壯大」工聯會聲勢，初則口角，仲差啲埋身肉搏，學民真係未踏入猴年就率先幫工聯會開年。
黎汶洛（左一）同周庭（左二）原本只係行花市，撞啱就提早幫工聯會開年。
吳秋北（右）同林淑儀（右二）面對黎汶洛（背對鏡頭者）玩寸個場，都無動氣。
吳秋北即席揮毫時「聾耳陳」上身，懶理黎汶洛不斷高叫口號挑釁。
林淑儀致詞時祝願全港打工仔「有汗出、有糧出」、「OT（加班）要補水」、「萬事有『雙糧』」，一切歌舞昇平，但純粹路過檔口嘅黎汶洛同周庭就不滿工聯會對全民退休保障立場模糊，即時由遊花市市民變身示威者，喺工聯會檔口高叫「支持全民退保」。林淑儀起初不知就裏，亦都跟住黎汶洛高叫「支持退休保障」，黎打蛇隨棍上再高叫「停建高鐵」、「停建大白象工程」，林淑儀先意識到呢位「粉絲」原來唔係自己友，即時收口。
吳秋北懶理挑釁
輪到吳秋北即席揮毫時，仲索性「聾耳陳」上身，懶理黎汶洛不斷高叫口號挑釁，亦無理會黎同工聯會成員互相推撞，只寫上「歲歲平安撐標時，家家和睦要退保」對聯，草草了結開幕儀式。難得吳秋北同林淑儀EQ都唔錯，面對黎汶洛玩寸個場都蓮子蓉咁嘅面口，搞到黎亦奈佢哋唔何。但林淑儀面對老公、立會進出口界議員「象哥」黃定光更無可奈何，事關象哥話退下火線都講咗三屆，但每屆都齋噏，林淑儀無奈話干預唔到，但就心痛象哥。
