立法會財務委員會聽日就會開始審議高鐵追加撥款申請，主席陳健波早前因被指有利益衝突，為免泛民以此為由「拉布」，宣布交由副主席「橄欖」陳鑑林主持會議。陳健波尋日一朝早就拉住橄欖「密密斟」，佢透露，自己仍會喺「幕後指點」畀意見，已將過去經驗總結成「主席秘笈」傳授畀橄欖，等橄欖可以喺陽光下剪布！陳健波又話計劃稍後聯同部分建制派議員約見政府官員，希望官員喺會議上可盡量回應議員嘅質詢，唔再畀機會泛民議員狙擊。

得真傳展信心

得到陳健波嘅真傳，橄欖對於順利主持會議好有信心，唯一擔心就係自己同陳健波都係「潮州人」，遇到泛民議員衝出主席枱時會「忍唔住」展現「潮州怒漢」個性。唔知係咪咁，陳健波仲建議秘書處為橄欖度身訂造一份保險，等橄欖主持會議時被人激到「爆血管」甚至「因公殉職」，都可以有得賠喎，認真大吉利是！

橄欖又宣布，為咗喺政府死線前通過撥款，決定喺本月二十日加開會議，而聽日開完會後，亦會同議員考慮加開會議嘅可能，以免工程延誤而帶來額外開支。

因不滿政府繞過工務小組，將高鐵追加撥款直接上財委會，白鴿黨胡志偉表明會加入拉布行列，全力提出同一地兩檢有關嘅臨時動議，期望政府喺討論過程中向市民交代。橄欖話暫時唔會要求議員提交臨時動議，以免予人感覺佢想「剪布」，但強調會「睇時間做嘢」，睇嚟佢已擬訂咗唔少「剪布」策略嘞！

第一手消息請下載on.cc東網iPhone/iPad/Android/Windows Phone Apps