政壇：河海魚不分 陳克勤被寸
話說大埔三門仔養殖區鹽田仔一帶嘅魚排，近日因紅潮而出現大批魚類死亡，立法會尋日討論到有關問題，有議員就借「魚」發揮，問問吓海魚突然改問城門河死魚問題，反被食物及衞生局局長高永文寸爆，質疑議員海魚、河魚都分不清。
陳克勤同葛珮帆唔識分河魚同海魚，被高永文寸爆。
高永文解釋，近日魚類死亡事件源於紅潮，話當局已作出有效措施加強監察。講講吓紅潮問題，陳克勤突然講咗去城門河死魚事件，要求當局交代令魚類死亡嘅污染源頭。高永文即刻話城門河同魚排唔同，又話今次魚排死魚係由紅潮引起，唔明佢講乜嘢「污染源頭」。
陳克勤被高永文KO（擊倒）之後，葛珮帆竟然仲唔醒目，再提城門河死魚問題。高永文再發功，話今次出現死魚嘅魚排係養海魚，而城門河入面嘅係河魚，質疑佢將兩者混為一談，又話城門河河魚係環境局負責，會幫佢轉達訊息，希望大家提出更有建設性嘅建議。
