政壇：葉劉主場零拉布 獲激讚
立法會「拉布」成風，泛民同建制派火藥味濃，但尋日人事編制小組委員會開會就遇到奇景，激進泛民議員不但冇點算開會法定人數，又無議員不停發言拉布，過程可謂相當順利，兩小時會議共通過兩項議程，完全零拉布，可謂近期嘅奇迹！會議咁順利，相信因主席葉劉淑儀主持會議夠晒得體。
葉劉淑儀尋日主持會議無遇拉布兼獲泛民議員大讚。
話說社民連「長毛」梁國雄喺會議上提問超時，原本都唔預政府官員會回答，但葉劉見剩餘時間應該傾唔完該項議程，就批准政府官員回應。此舉即時獲得長毛大讚，話唔使問葉劉攞身份證以證明真身，而人民力量「大舊」陳偉業更讚葉劉可以做立會主席。葉劉喺會議結束前亦搞搞氣氛，除咗祝各委員猴年生生猛猛、精精神神，仲話「你哋可以拉布，但對本主席好啲！」今日係立春，正式踏入猴年，睇嚟葉劉年初二被麒麟撞飛嘅黑氣已經消散喇！
其後黃毓民發現葉劉無着皮草，葉劉就自爆因此凍到流鼻水，毓民就笑佢身嬌肉貴，葉劉就話自己已經係長者，要保重身體，仲即時攞出長者八達通，以證身份，認真有幽默感。
