政壇：標時諷醫生 張宇人認衰
飲食界議員張宇人日前於立法會一個委員會語出驚人，爆出公立醫院嘅醫生都想標準工時立法，並聲稱「有標準工時咪可以死多啲病人，醫生個個唔使做囉」嘅言論惹起非議，香港公共醫療醫生協會（協會）尋日以會長陳沛然名義率先出招，點名要求張宇人收回不實言論，並公開道歉。張宇人喺晚上終於認衰，承認當日說話過急引起誤會，對此感到抱歉。
陳沛然(圖)要求張宇人收回不實言論，張喺晚上發新聞稿認衰。（資料圖片）
張宇人（資料圖片）
協會發出公開信話好多國際同本地研究證明醫生超時工作，先會影響病人服務，但搵唔到任何理據支持「標準工時死多啲病人」，協會認為張宇人有關言論唔恰當同具侮辱性，又引述有病人稱聽到有關言論感到害怕，促請張唔好「魚目混珠，混淆視聽」。
對於張宇人「醫生個個唔使做」言論，協會批評有關說法「涼薄」，強調醫生們從來冇堅持依工時上班，而事實上，大部分醫生時常早到遲下班，並對此冇怨言。協會促請張以身作則，唔好隨便講出冇事實根據、魚目混珠、混淆視聽嘅言論。
張宇人喺晚上發出新聞稿認衰，承認當日涉及公院醫生部分內容辭不達意，但同時希望各方唔會因而令焦點模糊，重申標準工時並非靈丹妙藥，唔可以解決本港現時公院人手不足嘅問題。
