政壇：人丁少 扮大佬 公文袋玩自閉

彈到林鄭體無完膚

公文袋認為林鄭要為佢嘅言論同施政失誤負責，更羅列林鄭近期嘅出位言行。公文袋批評林鄭喺處理俗稱「網絡廿三條」嘅《二○一四年版權（修訂）條例草案》時，拒絕回應網民訴求同接納泛民主派嘅修訂，加上佢「有權用到盡」嘅言論，完全係本末倒置，只為挑釁泛民。

林鄭曾話過唔想將高鐵撥款繞過立法會工務小組委員會，但最終都改變立場直交財務委員會審議，該黨就認為係無視程序公義嘅做法。至於全民退休保障方面，公文袋批評政府以扶貧概念處理退休保障問題，更直斥當局加設入息審查猶如施捨，態度涼薄，彈到林鄭體無完膚吖！

不過，公文袋喺區議會中人丁單薄，連參加俗稱「超級區議會」嘅區議會第二界別議席嘅入場券都攞唔到，仲有傳需要向其他泛民政黨借票「入閘」。既然該黨有求於其他泛民政黨，點解唔好好合作去組織杯葛，以表現泛民團結一面，仲可以借機聯誼有助借票添！依家嘅做法反而似扮「泛民大佬」搞寸個派對多啲囉！其實十個區議員真係好細嘅數目，睇嚟呢場杯葛都係流於樣式上，並無任何實質作用，做布景板都嫌佢人少。