城中鏡：新民黨靚太 趕生靈猴B
年宵市場昨開幕，新民黨主席葉劉淑儀拉大隊到維園，為佢哋嘅年宵攤位主持開幕兼切燒豬儀式，該黨仲來個靚女成員大晒冷，包括南區區議會海怡西議員陳家珮（Judy）、新民黨青委執行副主席王政芝（Gigi）及新成員大律師容海恩等。去年五月結婚的Judy就大爆自己屬猴，要盡快抱番個猴Ｂ喎！
陳家珮（左）同王政芝（右）都想生BB。
葉劉淑儀戴住隻猴子公仔亮相，與黨員主持維園年宵攤檔開幕。
同樣結咗婚將近一年嘅Gigi，則於早兩星期最凍嗰日去咗馬爾代夫避寒兼補度蜜月，佢仲話自己都好鍾意小朋友，都想喺三十五歲之前生番一仔一女。
葉劉戴住隻猴子公仔亮相，祝市民好似靈猴一樣咁「厚祿」、豐衣足食，又希望泛民議員猴年唔好好似齊天大聖咁大鬧天宮。講起去年農曆新年被麒麟撞飛，佢話嚟緊大年初二除咗會以嘉賓身份再去車公廟外，仲想邀請啲麒麟陪佢落區新年行大運，反客為主。
