各大政團都逐步走向年輕化，民建聯亦一樣，擔任三屆共十二年區議會（一）功能界別議席的葉國謙今年九月不再連任立法會議員，有關議席將展開內部提名，最少四人有意參加遴選，據悉，佢哋密鑼緊鼓向黨友拉票，競爭激烈下，該黨破天荒採取一人一票方式，由黨內一百一十七區議員選出代表，而火併最烈嘅應數中西區區議會副主席陳學鋒、北區區議員劉國勳。

議席大多陳劉之爭

建仔呢個「民主」遴選機制有一定玩法，首先係參選者需獲二十名黨內區議員提名，然後再經簡單多數制決定邊個出選。本月十五至二十六日接受提名，然後在下月十九至二十三日投票，目前最少有四人有意參加遴選，除陳學鋒、劉國勳外，仲有觀塘區議會副主席洪錦鉉及深水埗區議員鄭泳舜等。

外界一直盛傳這個議席會交棒予曾經擔任葉國謙助理的陳學鋒，但亦有黨內聲音對呢個方式不滿。不過，有分析指，議席大致仍係陳與劉之爭，特別劉國勳係區議會選舉「票王」，而且早在四年前已經有一班年輕黨友支持佢循區議會界別出選。此外，早前盛傳劉國勳有意挑戰黨友蘇西智，競逐當區區議會主席之位，最後關頭先煞停，預計今次力爭出線更唔少得。

第一手消息請下載on.cc東網iPhone/iPad/Android/Windows Phone Apps