政壇：港交所高層又走一個
港交所又見人事變動，原第二把交椅、即是曾任集團營運總裁嘅葛卓豪已於去年十二月中合約到期，並已低調離開港交所。據知，佢離職嗰時，行政總裁李小加都好識做，為葛卓豪大搞歡送會。
葛卓豪離職時已接近六十歲，符合港交所退休之齡。（資料圖片）
記得去年十二月上旬，港交所曾傳出裁員計劃，解散咗整個資料研究部門，老臣子之一嘅資料研究部門主管夏理遜被裁。會否再有第二波餘震，一直係市場好關心嘅話題，不過，葛卓豪今次絕唔係「被辭職」，而係合約完結。○四年加入港交所後，葛卓豪○七年升做營運總裁，一三年初轉任環球結算業務主管，到一四年四月就轉低調，轉任集團結算及監管事務顧問主席及合規事務總監，服務超過十年。
葛卓豪已經接近港交所六十歲退休年齡，好好享受人生係理所當然。不過，港交所高層又走一個，睇嚟真係十隻手指都數得完！
