政壇：搞錯地方名 周浩鼎被寸
立法會新界東補選本月底舉行，呢段時間區內多咗好多助選活動，有份落場嘅人應該已經準備充足喇，點知由細到大喺大埔生活嘅學民思潮成員周庭，就喺社交網站附上網上截圖，寸爆民建聯候選人周浩鼎嘅社交網站貼文搞錯晒大埔啲地方名。
周庭喺社交網站貼文，指出周浩鼎搞錯晒大埔啲地方名。（互聯網圖片）
據周庭嘅貼文，佢批評周寫錯富善街街市為「富善邨街市」，又搞錯太和港鐵站嘅名稱為大埔火車站。周庭坦言，身為大埔人一定知道富善街同富善邨係兩個唔同地方，叫周浩鼎做好功課先發貼文。我哋其後翻查周浩鼎嘅社交網站，發現該貼文嘅文字表述已經更正為富善街街市及太和火車站，似乎知道搞錯之後即刻「補鑊」。
今次新界東補選有七名候選人，除咗周浩鼎外，還有公民黨楊岳橋、新思維黃成智、本土民主前線梁天琦、獨立方國珊、梁思豪及劉志成。
