立法會財務委員自復會後便一直有拉布戰，主席陳健波日前表決港珠澳大橋工程追加撥款時，因為提醒議員投贊成票，遭質疑唔中立，陳雖為此致歉，但尋日出席一個電台節目，佢都顯得氣憤未平，仲話自己係「秀才遇着賊」。秀才遇着兵，就有理說不清啫，遇着賊嘅歇後語應該係乜呢？被洗劫一空？定係退避三舍呢？

陳健波

陳健波尋日決定唔會主持高鐵工程追加撥款嘅會議，改由副主席陳鑑林主持，佢坦言，為免被醜化，即使佢喺高鐵事件上並無利益衝突，仍忍痛決定唔會主持有關會議。依家議會愈來愈政治化，無論邊個建制派議員主持會議，都難免喺泛民嘅拉布陣同撥款涉及嘅公共利益中兩面不是人，陳健波唔係第一個，亦唔係最後一個，建制派議員既然爭到委員會正副主席嘅控制權，就要有秀才都打得嘅本事至得！

第一手消息請下載on.cc東網iPhone/iPad/Android/Windows Phone Apps