政壇：擴闊選民 泛民煲無米粥
去年政改方案搞到全城撕裂，好多人都遺憾本港政改向前行嘅大好機會被泛民否決而一去不回，結果做咗罪人嘅泛民主派又出招，今次由白鴿黨嘅單仲偕、會計界梁繼昌及資訊科技界莫乃光（Charles）出面，趁法案委員會正審議《二○一五年選舉法例（雜項修訂）（第二號）條例草案》，話要對條例草案提出修正案，擴闊三個功能界別嘅選民基礎喎。不過，佢哋嘅建議可以話係翻炒舊料，毫無新意，連提案者都冇乜信心，睇怕煲無米粥機會大啲！
擬三月完成修正案
佢哋想提嘅修正案係擴闊金融服務界、保險界及資訊科技界的選民基礎。點解選擇呢三個界別？單雞話貪呢三個界別易入手，而且政府亦正就金融服務界有關條文提出修訂，都叫有個切入點喎。至於擴闊選民嘅構思，佢哋就話，現時證監局發出十種牌照，當中約有四至五萬人，撇除部分可能為外籍人士，相信如果可以納入持有呢啲牌照嘅人做選民，選民基礎可增加四、五萬人。
而保險界方面，現時有百多間公司為選民，希望修訂條例後，公司或個人選民數目都可可以增加，料有九萬人可成為合資格選民。Charles就話，資訊科技界有唔同屬會作為投票機制，佢就希望可以增加多五個會，咁就可以增加二千三百張個人票以及增加三百張公司票。
泛民喺立法會搏命拉布，但佢哋就預料條例草案喺五月底、財政預算案審議完後就可恢復二讀，佢哋會努力於三月完成修正案。但議員提出修正案要經立法會分組點票通過喎，單雞就話，最差情況其實可能係政府反對有關修正案，提都冇得提，但唔代表政府可以乜都唔諗，所以做咗先喎。
