城中鏡：總理出閣
尋日仁濟醫院舉辦慈善攝影集《活誌 A Book About Lives》新書發布會，主席林煒珊同一班董事局成員拉大隊出席宣傳。在場見到紀惠集團行政總裁湯文亮嘅女兒、總理湯振玲神采飛揚，皆因佢四月將同拍拖唔夠一年嘅男友拉埋天窗。湯振玲就話既然雙方都覺得對方適合自己，就唔使再拖喇，仲話婚後會盡快生兒育女，生兩個就收工，聲言唔想做高齡產婦喎。
湯振玲四月出閣，聲言婚後盡快「造人」。
林煒珊（左）同又一山人都非常欣賞仁濟員工嘅熱誠。
鄭李華熙（左起）、嚴徐玉珊同孫蔡吐媚坐埋一齊觀看仁濟宣傳短片。
員工熱誠感動又一山人
為咗宣傳新書，一眾仁濟董事局成員一齊欣賞設計師又一山人幫佢哋拍攝嘅三條短片，內容大致圍繞該醫院員工對多年工作嘅感受領悟、長者尋找退休後嘅興趣同受助殘障人士嘅日常生活等。林煒珊欣賞完片段後話，難忘同班長者一齊參與時裝表演，當時搵時裝設計師幫長者設計同佢哋心願有關嘅服飾，見長者玩得開心，感到好欣慰，又好欣賞有員工喺仁濟工作已逾二十年，仍毫不厭倦，當長者如親人咁照顧。
又一山人就話拍攝期間最感動嘅反而係員工嗰部分，可能因為拍攝長者同受助人士片段前已有心理準備，反而拍攝員工時真係冇預計過佢哋會咁有熱誠，有位員工已達退休年齡，但即使女兒叫佢退休佢都唔肯，堅持繼續服務，仲話服務長者時，得到嘅比付出多，令佢非常意外同感動。
同場仲有副主席嚴徐玉珊、黃美詩、總理鄧肇殷、孫蔡吐媚同鄭李華熙等。講起近排零售界寒冬情況，身兼卓悅控股副主席助理嘅鄧肇殷話，零售依家唔係佢主打工作，轉而專注美容中心生意，會相對穩定喎。
